tasweer, achi lagti hay, sarfraz baig, تصویر، اچھی لگتی ہے، سرفراز بیگ

تصویر

تمہاری خاموش تصویر

مجھ سے باتیں کرتی ہے

تمہاری لامبی زلفیں

مجھ سے ہاتھ مانگتی ہیں

تمہاری روشن پیشانی

مجھ سے بوسہ مانگتی ہے

تمہاری نرگسی آنکھیں

مجھ سے سوال کرتی ہیں

تمہاری ستواں ناک

میری خوشبو مانگتی ہے

تمہارے خوبصورت لب

میرے پیاسے لب مانگتے ہیں

تمہارا کھلی کتاب ساچہرہ

مجھ سے عنوان مانگتا ہے

تمہاری صراحی دار گردن

مجھ سے ہار مانگتی ہے

تمہاری مخروطی انگلیاں

مجھ سے پھول مانگتی ہیں

تمہاری نازک کلائی

مجھ سے کنگن مانگتی ہے

تمہارے گداز ہاتھ

مجھ سے حنا مانگتے ہیں

تمہاری پتلی کمر

مجھ سے کمر بند مانگتی ہے

تمہارے گورے گورے پاؤں

مجھ سے پازیب مانگتے ہیں

تمہارے سڈول بازو

میری آغوش مانگتے ہیں

تمہارا پیار بھرا دل

میر دھڑکنیں مانگتا ہے

تمہاری عقل سلیم

میری سوچیں مانگتی ہے

تمہاری خاموش تصویر

مجھ سے باتیں کرتی ہے

سرفراز بیگ، ۱۹۹۸۔۰۴۔۲۳ لنڈن